తెల్ల వెంట్రుక పీకితే మిగతా జుట్టు తెల్లబడుతుందా? నిజం ఏంటి?

అద్దం న్యూస్, వెబ్‌డెస్క్: మన జుట్టు మన అందాన్ని మాత్రమే కాకుండా వ్యక్తిత్వాన్నీ ప్రభావితం చేస్తుంది. అందుకే ఎంతోమంది నల్లగా, మెరిసే జుట్టును కాపాడుకోవడానికి ఎన్నో ప్రయత్నాలు చేస్తూనే ఉంటారు. అయితే వయస్సు పెరిగేకొద్దీ లేదా ఒత్తిడి, హార్మోన్ల మార్పులు, పోషక లోపాల వంటివి కారణంగా కొంతమంది చిన్న వయసులోనే తెల్ల జుట్టుతో బాధపడుతున్నారు. ఈ సందర్భాల్లో “ఒక్క తెల్ల వెంట్రుక పీకితే మిగతావీ తెల్లబడతాయి” అనే మాట తరచుగా వింటాం. అయితే దీనిలో ఎంతవరకు నిజం ఉంది? అనేది తెలుసుకుందాం..

అపోహకు శాస్త్రీయ సమాధానం

జుట్టు వర్ణం మెలనిన్ అనే పిగ్మెంట్‌పై ఆధారపడి ఉంటుంది. వయస్సు, జన్యుశాస్త్రం, ఒత్తిడి, లేదా శరీరంలోని పోషక లోపాలు మెలనిన్ ఉత్పత్తిని తగ్గించినప్పుడు వెంట్రుకలు బూడిదరంగులోకి లేదా తెల్లగా మారతాయి.
కానీ ఒక వెంట్రుకను పీకడం వల్ల పక్కనున్న ఇతర వెంట్రుకలు తెల్లబడవు. ప్రతి వెంట్రుక తనకంటూ ఒక ఫోలికల్‌లో (కుదుళ్లో) పెరుగుతుంది. ఆ ఫోలికల్‌లో మెలనిన్ తగ్గితే ఆ వెంట్రుక మాత్రమే తెల్లగా వస్తుంది — పక్క ఉన్న వాటిపై ఆ చర్యకు ఎలాంటి ప్రభావం ఉండదు.

తెల్ల వెంట్రుకలను ఎందుకు పీకకూడదు?

తెల్ల వెంట్రుక ఒక్కటిని పీకడం పెద్ద సమస్యలా కనిపించకపోయినా, ఇది తల చర్మానికి నష్టం కలిగిస్తుంది.
– పీకేటప్పుడు ఫోలికల్ దెబ్బతింటుంది.
– దీని ఫలితంగా ఆ ప్రదేశం నుంచి తిరిగి జుట్టు రావడం ఆగిపోవచ్చు.
– కొన్నిసార్లు తల చర్మంలో ఇన్‌ఫెక్షన్, దురద లేదా గీతలు ఏర్పడవచ్చు.

అందువల్ల తెల్ల వెంట్రుకలను పీకకుండా, జుట్టు ఆరోగ్యం కోసం సహజ మార్గాలు అవలంబించడం మంచిది.

జుట్టు రంగులు (డైలు) వాడితే సమస్యా?

కొంతమంది “రంగు వేస్తే తెల్ల జుట్టు మరింత పెరుగుతుంది” అని భావిస్తారు. ఇది కూడా అపోహే. డైలు కేవలం బయట ఉన్న వెంట్రుకలకు మాత్రమే ప్రభావం చూపుతాయి. కుదుళ్లలోని మెలనిన్ కణాలపై దీని ప్రభావం ఉండదు. అయితే, రసాయనాలు అధికంగా ఉన్న డైలు వాడితే జుట్టు పొడిబారటం లేదా బలహీనమవడం జరిగే అవకాశం ఉంది. కాబట్టి నేచురల్ హెర్బల్ డైలు లేదా హెన్నా వంటి సహజ ప్రత్యామ్నాయాలను ఉపయోగించడం బాగుంటుంది.

జుట్టు ఆరోగ్యానికి అవసరమైన పోషకాలు

జుట్టు నల్లగా, బలంగా ఉండటానికి శరీరానికి సరిపడా పోషకాలు అందాలి. వీటిలో ముఖ్యమైనవి:
– విటమిన్ బి6, బి12, ఐరన్ – రక్త ప్రసరణను మెరుగుపరుస్తాయి.
– సెలీనియం – హార్మోన్ల సమతుల్యానికి సహాయపడుతుంది.
– విటమిన్ సి – మెలనిన్ ఉత్పత్తికి తోడ్పడుతుంది.

ఆకుకూరలు, గింజలు, తృణధాన్యాలు, ఉసిరి, సిట్రస్ పండ్లు, సాల్మన్ వంటి చేపలు ఈ పోషకాలు సమృద్ధిగా అందిస్తాయి. జుట్టు తెల్లబడడం సహజ ప్రక్రియ. దానిని భయపడి వెంట్రుకలు పీకడం కాదు, శరీర ఆరోగ్యాన్ని మెరుగుపరచడం, పోషకాహారాన్ని పాటించడం మరియు ఒత్తిడిని తగ్గించడం ద్వారానే దీన్ని నియంత్రించవచ్చు.