అంబ‌ర్‌పేట, అక్టోబర్ 29, ( అద్దం న్యూస్ ) : బీసీ హక్కుల సాధన, సామాజిక న్యాయం, విద్యారంగ అభివృద్ధి, చేనేత కార్మికుల సంక్షేమం కోసం కృషి చేస్తున్న గుజ్జ సత్యం ( గుజ్జ సత్యనారాయణ ) కు గవర్నర్ కోటాలో ఎమ్మెల్సీగా అవకాశం కల్పించాలని వివిధ సామాజిక వర్గాలు, చేనేత సంఘాలు, పద్మశాలి సమాజ ప్రతినిధులు, బీసీ సంఘాలు, విద్యా, వైద్య రంగాలకు చెందిన ప్రతినిధులు రాష్ట్ర ప్రభుత్వాన్ని కోరారు. ఆయన సేవలు, అనుభవాన్ని గుర్తించి రాజ్యాంగ నిబంధనలు, సంబంధిత అర్హతలు, నియామక ప్రక్రియకు అనుగుణంగా అభ్యర్థిత్వాన్ని పరిశీలించాలని విజ్ఞప్తి చేశారు. చేనేత వర్గాల చైతన్య వేదిక జాతీయ అధ్యక్షుడు డాక్టర్ చిక్కా దేవదాస్ ఆధ్వర్యంలో గురువారం హైదరాబాద్‌లోని కాచిగూడ ఓ హోటల్‌లో విలేక‌రుల స‌మావేశాన్ని ఏర్పాటు చేశారు. ఈ కార్యక్రమంలో చేనేత వర్గాల చైతన్య వేదిక జాతీయ అధ్యక్షుడు డాక్టర్ చిక్కా దేవదాస్, తెలంగాణ పద్మశాలి సంఘం రాష్ట్ర ఉపాధ్యక్షుడు పెద్ది జగదీశ్, కొండా లక్ష్మణ్ బాపూజీ ఫెడరేషన్ కోశాధికారి పుట్టబత్తిని జ్ఞానేశ్వర్, రాష్ట్ర పద్మశాలి నాయకులు జిల్లా నరేంద్ర, వంగాల బాలరాజ్, గంజి వెంకటేశం, వెంకట్రామయ్య, రాజు తదితరులు పాల్గొన్నారు. సోషలిస్ట్ పార్టీ జాతీయ కార్యదర్శి కేవీ గౌడ్, బీసీ మహిళా నాయకురాలు సోమకవిత తదితరులు పాల్గొన్నారు.
ఈ సంద‌ర్భంగా వారు మాట్లాడుతూ… చేనేత కార్మికులు, పద్మశాలి సమాజం, బీసీ సంఘాలు, విద్యాసంస్థలు, వైద్య సంస్థలు, ఇతర ప్రజా, సామాజిక సంఘాల ప్రతినిధులకు శాసనమండలి వంటి వేదికల్లో తమ సమస్యలను ప్రస్తావించే అవకాశం ఉండాలని వక్తలు అభిప్రాయపడ్డారు. వివిధ రంగాల్లో క్షేత్రస్థాయిలో పనిచేసిన వ్యక్తులకు తగిన ప్రాతినిధ్యం లభిస్తే ప్రజా సమస్యలను ప్రభుత్వ దృష్టికి తీసుకెళ్లేందుకు అవకాశం ఉంటుందని పేర్కొన్నారు. రాష్ట్రంలోని వివిధ జిల్లాల్లో బీసీ సంఘాలు, ఇతర ప్రజాసంఘాలు గుజ్జ సత్యంకు ఎమ్మెల్సీ అవకాశం కల్పించాలని కోరుతూ తీర్మానాలు చేసినట్లు తెలిపారు. ఆయా సంఘాల నుంచి వచ్చిన మద్దతు, విజ్ఞప్తులను సమన్వయం చేసి రాష్ట్ర ప్రభుత్వానికి తెలియజేయాలని పేర్కొన్నారు. తెలంగాణలోని ప్రైవేట్ పాఠశాలల సమస్యలు, విద్యారంగ అభివృద్ధి అంశాలపై పనిచేస్తున్న బడ్జెట్ స్కూల్స్ మేనేజ్‌మెంట్ అసోసియేషన్ ఆఫ్ తెలంగాణ ( BSMAT ) కూడా గుజ్జ సత్యం అభ్యర్థిత్వాన్ని పరిశీలించాలని మద్దతు తెలిపినట్లు నిర్వాహకులు గుర్తుచేశారు. విద్యారంగంలో సుదీర్ఘకాలంగా పనిచేస్తూ విద్యాసంస్థల అభివృద్ధి, ప్రైవేట్ పాఠశాలల సమస్యలు, ఉపాధ్యాయుల సంక్షేమం, నాణ్యమైన విద్య వంటి అంశాలపై గుజ్జ సత్యం దృష్టి సారించారని పేర్కొన్నారు. చేనేత రంగం అనేక కుటుంబాల జీవనోపాధితో ముడిపడి ఉందని, చేనేత కార్మికుల ఉపాధి, సంక్షేమం, మార్కెట్ సమస్యలు, ప్రభుత్వ పథకాల అమలు వంటి అంశాలపై మరింత దృష్టి అవసరమని వక్తలు తెలిపారు. గుజ్జ సత్యం సేవలు, అనుభవం, సామాజిక రంగాల్లో ఆయన చేసిన కృషిని పరిగణనలోకి తీసుకుని గవర్నర్ కోటా ఎమ్మెల్సీ అభ్యర్థిత్వాన్ని పరిశీలించాలని రాష్ట్ర ప్రభుత్వాన్ని కోరారు. రాజ్యాంగ నిబంధనలు, చట్టపరమైన అర్హతలు, నియామక ప్రక్రియకు అనుగుణంగా ప్రభుత్వం తగిన నిర్ణయం తీసుకోవాలని వారు కోరారు.
