అద్దం న్యూస్, వెబ్డెస్క్: ప్రముఖ మానవ హక్కుల కార్యకర్త, 2023 నోబెల్ శాంతి పురస్కార గ్రహీత (Nobel Peace Prize) నర్గెస్ మొహమ్మదిని ఇరాన్ పోలీసులు మరోసారి అదుపులోకి తీసుకున్నట్లు ఆమె మద్దతుదారులు, మానవ హక్కుల సంస్థలు వెల్లడించాయి. తాజా సమాచారం ప్రకారం.. ఇటీవల అనుమానాస్పద పరిస్థితుల్లో మరణించిన ఓ న్యాయవాది స్మారక చిహ్నం వద్ద నర్గెస్ మొహమ్మదిని పోలీసులు నిర్బంధించినట్లు తెలుస్తోంది. అయినప్పటికీ, ఆమె అరెస్ట్పై ఇరాన్ ప్రభుత్వం నుంచి ఎటువంటి అధికారిక ధ్రువీకరణ వెలువడలేదు.
ఇరాన్లో మహిళా హక్కులు, సమానత్వం కోసం మూడు దశాబ్దాలకు పైగా ప్రభుత్వానికి వ్యతిరేకంగా పోరాడుతున్న నర్గెస్ మొహమ్మదికి జైలు శిక్షలు, కొరడా దెబ్బలు కొత్త కాదు. అనేకసార్లు ఆమె నిర్బంధాన్ని అనుభవించారు. ఈ నిరంతర, సాహసోపేతమైన కృషికి గుర్తింపుగా ఆమెకు 2023లో నోబెల్ శాంతి బహుమతి లభించింది. బహుమతి ప్రకటించిన సమయంలోనూ ఆమె జైలులోనే ఉన్నారు.
తాజా ఉపశమనం.. మళ్లీ అరెస్ట్
వివిధ ఆరోపణల కింద జైలు శిక్ష అనుభవిస్తున్న నర్గెస్కు, ఆరోగ్య కారణాల దృష్ట్యా 2024 డిసెంబరులో కొద్ది వారాల పాటు పెరోల్ మంజూరైంది. పశ్చిమ దేశాలు, అంతర్జాతీయ హక్కుల నేతల నుంచి ఇరాన్పై వచ్చిన ఒత్తిడి కారణంగా ఆమెకు లభించిన ఈ తాత్కాలిక ఉపశమనం కొనసాగింది.
ఈ పెరోల్ సమయంలోనే, ఇటీవల ఇరాన్-ఇజ్రాయెల్ మధ్య 12 రోజుల పాటు ఉద్రిక్తతలు నెలకొన్నప్పుడు ఆమె బహిరంగంగానే ఉన్నారు. ఈ విరామాన్ని ఆమె నిరసన కార్యక్రమాల్లో, అంతర్జాతీయ మీడియా వేదికలపై చురుగ్గా పాల్గొనడానికి ఉపయోగించుకున్నారు. మహిళల స్వేచ్ఛ కోసం ఆమె చేస్తున్న పోరాటం, పౌర సమాజంలో ఆమెకున్న ప్రభావం కారణంగా, తాజాగా ఆమె అరెస్ట్ అంశం అంతర్జాతీయంగా మరోసారి ఇరాన్ మానవ హక్కుల పరిస్థితులపై దృష్టి సారించేలా చేసింది.
https://addamnews.com/wp-content/uploads/2026/06/Untitled-2-copy-2.png
