ఘోరం.. అన్నదమ్ముల దారుణహత్య

ఘోరం.. అన్నదమ్ముల దారుణహత్య

అద్దం న్యూస్, వెబ్‌డెస్క్ : పల్నాడు జిల్లాలో చోటుచేసుకున్న జంట హత్యల ఘటన స్థానికంగా తీవ్ర కలకలం రేపింది. దుర్గి మండలం, అడిగొప్పల గ్రామంలో అన్నదమ్ములను ప్రత్యర్థులు దారుణంగా నరికి చంపారు. కుటుంబ కలహాల నేపథ్యంలోనే ఈ ఘోరం జరిగినట్లు ప్రాథమిక సమాచారం అందుతోంది. మృతులుగా హనుమంతు (అన్న), శ్రీరాంమూర్తి (తమ్ముడు) గా పోలీసులు గుర్తించారు. ఆదివారం అర్ధరాత్రి సమయంలో ఈ దారుణం జరిగినట్లు తెలుస్తోంది. ప్రత్యర్థులు వీరిపై వేటకొడవళ్లతో అత్యంత కిరాతకంగా దాడి చేసి హతమార్చారు. ఈ ఘటనతో అడిగొప్పల గ్రామంలో తీవ్ర భయాందోళనలు నెలకొన్నాయి.

రాజకీయ కోణం..

మృతులు ఇద్దరూ తెలుగుదేశం పార్టీ (తెదేపా) సానుభూతిపరులుగా గుర్తించారు. అయితే, హత్యలకు ప్రధాన కారణం కుటుంబ కలహాలుగా పోలీసులు అనుమానిస్తున్నారు. ఈ నేపథ్యంలో హత్యల వెనుక రాజకీయ కారణాలు ఏమైనా ఉన్నాయా అనే కోణంలో కూడా పోలీసులు దర్యాప్తు చేస్తున్నారు.

పోలీసుల దర్యాప్తు..

ఘటన గురించి తెలుసుకున్న వెంటనే పోలీసులు భారీగా ఘటనాస్థలికి చేరుకున్నారు. మృతదేహాలను స్వాధీనం చేసుకుని పోస్టుమార్టం నిమిత్తం ఆసుపత్రికి తరలించారు. ఈ ఘటనపై కేసు నమోదు చేసుకున్న పోలీసులు, హత్యకు గల కారణాలపై పూర్తి స్థాయిలో దర్యాప్తు చేపట్టారు. నిందితులను త్వరలో పట్టుకుంటామని అధికారులు తెలిపారు. పల్నాడులో శాంతిభద్రతలకు విఘాతం కలిగించిన ఈ దారుణ ఘటనపై స్థానిక రాజకీయ వర్గాలలో తీవ్ర చర్చ జరుగుతోంది.

https://addamnews.com/wp-content/uploads/2026/06/Untitled-2-copy-2.png