ఆశ్రయ గృహాలు, ఓటర్ల జాబితా కార్యకలాపాలను సమీక్షించిన జీహెచ్ఎంసీ కమిషనర్ ఆర్వి.కర్ణన్
హైదరాబాద్ బ్యూరో, నవంబర్ 12, ( అద్దం న్యూస్ ) : నగర వ్యాప్తంగా వివిధ పౌర, పరిపాలనా కార్యకలాపాల పురోగతిని సమీక్షించేందుకు గురువారం గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ) కమిషనర్ ఆర్వి.కర్ణన్ అదనపు కమిషనర్ ( క్రీడలు ) పి.ఉదయ్ కుమార్ తో కలిసి, జోనల్ కమిషనర్లు, డిప్యూటీ కమిషనర్లు, అసిస్టెంట్ మున్సిపల్ కమిషనర్లు ( ఏఎంసీలు ), ప్రాజెక్ట్ ఆఫీసర్లతో ( పీఓలతో ) సమీక్షా సమావేశాన్ని నిర్వహించారు. ఈ సమావేశంలో ఆస్తి పన్ను వసూళ్ల ప్రయత్నాలను ముమ్మరం చేయాలని, నిర్దేశించిన రోజువారీ లక్ష్యాలను సాధించాలని, ఆస్తి పన్నుకు సంబంధించిన ఫిర్యాదులను నిర్దేశిత కాలపరిమితిలోగా పరిష్కరించేలా చూడాలని కమిషనర్ డిప్యూటీ కమిషనర్లను, ఏఎంసీలను కమిషనర్ కర్ణన్ ఆదేశించారు. స్వయం సహాయక బృందాల ( SHG ) ఏర్పాటును వేగవంతం చేయాలని, రోడ్ల పక్కన నివసిస్తున్న నిరాశ్రయులు, బలహీన వర్గాల వారిని గుర్తించి, వారిని నిర్దేశిత ఆశ్రయ గృహాలకు తరలించి పునరావాసం కల్పించేందుకు ప్రత్యేక చర్యలు తీసుకోవాలని ప్రాజెక్ట్ ఆఫీసర్లకు ( పీఓలకు ) సూచించారు. హైదరాబాద్ను భిక్షాటన రహిత నగరంగా మార్చడానికి సమన్వయ ప్రయత్నాల ఆవశ్యకతను కమిషనర్ నొక్కి చెప్పారు. నగర పరిశుభ్రతను కాపాడటంలోనూ, పారిశుద్ధ్య ప్రమాణాలను మెరుగుపరచడంలోనూ అంకితభావంతో కృషి చేసి, జీహెచ్ఎంసీకి ప్రతిష్టాత్మక స్వచ్ఛ సర్వేక్షణ్ అవార్డు లభించేలా చేసిన పారిశుధ్య సిబ్బంది, డిప్యూటీ కమిషనర్లు, జోనల్ కమిషనర్లు, అదనపు కమిషనర్ ( పారిశుద్ధ్యం) లను కమిషనర్ అభినందించారు. వారి బృంద స్ఫూర్తిని, నిబద్ధతను ఆయన ప్రశంసించారు.








